Wolwale – Luke 10.25-37 “The Good Samaritan” [onrW]


Kaire wongke, mana wongke e namale lo yemei ka ifle yarine Jisas mi wongke. Ka wu yarine Jisas nanrona, “Tikse, ki ese kangke ompla fika uporo se ki kaike uporo nanrona nanrona?” Ka Jisas yireni wu nanrona, “Nu e neꞌre mi fika wiye lo? Yene yuru ka yene yem mi nomu rongkele?” Ka mana namo yireni Jisas nanrona, “ ‘Manawamo wu God yene, yene e samo wolyane wu wamo puna yene ka spirit yene ka kero yene ka wola yene.’ Ka, ‘Yene samo wolyali nu uma e naine ekrene yene wamo yukaine yene fa wolayaneye yene kore.’ ” Ka Jisas yireni wu nanrona, “Mi e yene yireye namo sa won alwone. Nanrona fane, yene yangke rona sa yene e waiye nanrona nanrona.” Ka man e namale lo yangke nanrona sa nu uma e nuru wu uporo wamo, ka wu yarine Jisas nanrona, “Fopi sa naine ekrene ki?” Ka Jisas yireni wu nanrona, “Mana wongke waiye taun wamo Jerusalem ka palo pai taun Jeriko, ka uma fafaire e pekinaine rokoi nuꞌpuni ommo. Ka ningko ommo papri wunini ka nufu wu pai la wu yire yangke le ri ka nupone waiye ka painri. Pris wongke palo paiyiye rokoi namo, ka wi koii e mana waiyeye namo, nama pitiri nro yuru ka pai rokoi repo ka pai kei. “Ka Livai wongke re yolowi rokoi namo, wu yolowi koii e mana waiyeye, nama pitiri nro yuru ka pai rokoi repo ka pai kei. Ka mana wongke e distrik Samaria re yolowi rokoi namo, wu yolowi koii e mana yire yangke riye namo. Ka wu yuru wu, wu wolyaure wamo mana namo. Wu pai ekrene mana namo ka yasiro ori e wu, yaiku wel ka wain palo muꞌku e wu ka yukaro. Ka wu yereri mana namo ka yaune donki e wone ka yurune pai hotel wongke ka saimoro wu. Ningkinama wu yem romaula silva plainrane ka yaꞌne hotel ripile ka yireni wu nanrona, ‘Yene ese saimoro wu. La e yene yem romaula yeneni ka saimoro wu, e ki koloki kore, ki e kawe yene romaula e yene saimoro mana namo.’ ” Ka Jisas yarine mana e namale lo kore nanrona, “Nu uma plainrikera namo, fina sa wi ekrene ka yangke uporo mana namo e isi uma nufune?” Ka mana e namale lo yireni Jisas nanrona, “Mana e wolyaureye ka saimo yaneye.” Ka Jisas fa yireni wu nanrona, “Nanrona fane yene re pai yangke nale nanrona.”

Leave a Reply

Your email address will not be published. Required fields are marked *